عزيزي جوزي المنظر
حبايبنا وعلشان كل حاجه إتغيرت وكل القيم إتبدلت ومبقتيش في حاجه
زي زمان وبقي الاغلبية من الشباب أنه يشوف البنت حلوة وجميله وبس
وبقا التركيز على المظهر مش على الجوهر وبقت البنت سلعة رخيصة عند
الكتير من الشباب دون إحترام لكيانها ولمشاعرها وعدم إحتوائها وتقديرها
كان ولابد أن اهديكم إحدى القصائد التي تعتبر رساله على لسان كل بنت
وبمثابة قذيفة تطلقها تجاه كل شاب يكون كل همه جمال البنت بالشكل وفقط..
عزيزى جوزى المنتظر
اللى يمكن جاى ويمكن برضه جاى...فى وقت تانى
وفى مكان كل حاجة حلوة واقع فيه وما هياش امانى
لو سمحت..اوعى تفتكر ان انا مهما انجرحت انجرحت
الجروح انا واقفة فوقها وهى تحت
ولومعاك مفتاح لقلبى وجيت فتحت
حتلاقينى...كلى مقرية فى عينى
شكلى واضح..طبعى واضح..صوتى من زعيقى رايح
ضحكتى وحزنى فضايح
قلبى فى كل اللى حوالين منه طايح
مش قديمة..لكن قديمة
مؤمنة ان الكلمة حاجة ليها قيمة
*******
يعنى بالتالى تلاقينى ليل نهار بدى نصايح
عاملة زى الشربة..صعبة بس بتسهل كتير
احلى حاجة فيا هى.. نفسهاعيبى الكبير
لو عاوزنى خدنى انا ونفسى على بعض
شروة واحدة انا اصلى نازلة عليا عرض
يعنى كله بسعر واحد.. انا وجاى معايا ..جنونة ..وضمير
اشترينى لو بتفهم فى التحف والانتيكات
حاجة سينييه من زمن ايام ماكانوا البنات لسة بنات
حاجة مش مستعملة
حتة مش متبهدلة
*******
حختصرلك وصفى وافهم..ست بيت على عيلة
الطبيخ بيحب يبقى من ايديا
والضفاير برضه بعملها بأيديا
ييجى وقت عليا أأنتخ
ووقت تانى تشوفنى وكأنى كتيبة رايحة جاية
اوعى تفتكر انى ملبوسة كفى الله الشر ..لأ انا عادية
لما حتكلمنى فى أحوال البلد دى حتلقى صوتى قد صوتك
وان ناديتلى بكلمة حلوة فجأة هتحول لشـــادية
اللى قدامك دى واحدة بجد مجنونة ودوشة
وبرضه بنت حلال وهادية
لما حتقول الحقيقة..حعشقك ب200 طريقة
واما هتحور وتكدب..يبقى تشـــرب
حتلاقينى فى لحظة فى الجبهة المعادية
فيا ملوين الف ست حتلاقيهم
لما تختارنى وتاخدنى شروة بيهم
حتلاقيهم ويا بنت جوة منى
وحتلاقيها البنت دى بتدارى فيهم
*******
بنت طلباتها بسيطة
جايز اما انت تعاملها تشك اصلا انها مش ع الخريطة
او ماهيش واعية وعبيطة
عمرها ماحلمت تقابلك طول بعرض قصادها طور
ولا قلبها البرىء عاملك معاملة اللى داخل على مكتب التنسيق
واشترط تبقى مهندس او دكتور
عمرها ما إتمنت انك تبقى طالع م الفانوس
عندك الفيلا اللى هى..او راكب احدث عربية
هى اصلها فى نظر الجعــان تتشاف غبية
مش بتبهرها الفلوس
هى كل اللى بتشغلها..النفـوس
عايزة واحد لسة نفسيته سليمة مش واكلها السوس
مش منفسن م اللى حواليه مش جاسوس
*******
حد اجدع منها ارجل منى
حد يفهمنى أما اغانى
حد يبقى لازمه عقلى..قلبى..كلـى
حد اصــدق لو يقوللى
حد يمشى معايا مشوارى اللى جاى
حد ما يجيش فجأة والقاه قاللى بــاى
حد ياخد نصى واخد منه نصه
حد لو حختار فى عمرى الف مــرة
يبقى برضه هــــو نفســـه
يوم مايبعد عنى يفضل جوة منى ..واعيش بحسه
يفهم انى لا بنبهر..ولا بتسحر..ولا تغيرنى الظروف
هى كل القصة انى عايزة اشـــوف
ولما اشب بشب بــس عشان اشــوف
وانى اكــتر واحدة تتأمن على العـر اللى جاى
وانى بتطور لكنى..مافيش من الناحية دى منى..اى خوف
*******
الخلاصـة..لو بيفهم فى المعادن والأصول
حبقى مش محتاجة اشرح نفسى اصلا والا اقول
حتة انك تشحت الفهم دى تـــوجع
تلقى نفسك ماشى تشرح..انت ليه بتبقى هادى
وليه مع دوت بتضحك ..وليه مع دوت مكشـر
وليه للتانى بتـردح
ليه بيأخدك السكوت اوقات وتسـرح
اللى بيزعلنى فى الموضوع دا إنى ..حد أوضح
والوضوح دا جايز انه يبقى هو اللى ملزمنى انى أوضح
*******
لما تبقى بسيـط لدرجة خلاص ماهيش متصدقة
يبقى فعلا لأ بقى .. السؤال يبقى ساعتها
من القلوب اللى الزمن بالغباء اصبح ناعتـها
انتى ايه حقيقية والا ايه حكايتك؟؟
أرد اقول لأ انا بلاستيك
رد ساخر..بس اهو جايب م الاخر
اللى مش قادر يصدق..او يميز الفروق
قلبى مش ملزم يحبه..او يقولله افهمنى فـوق
*******
مرة واحدة حتة منى اوووى قالتلى
اللى انتى تبقى ضلعه...يبقى هو شكله ايه؟؟؟
ابتسمت وقولت ..ماهو لو بالمقــاس
يبقى واحد استحالة مهما نعمل حنلاقيه
ولو بألأحساس..
قلبى حـاسس ان ماخلصـوش ولسة برضه فى .
[YOUTUBE]VDnvGcZmXZk[/YOUTUBE]
للشاعرة الرآئــعة / نــور عبد الله
22 / 3 / 2014
الحب الصامت
03-22-2014, 04:22 PM
رســالــه مــن بنت مصــريــه
