اول بوسه في حياتي

زهـ دمعه الم ـرة · 02-06-2008, 05:21 PM

أول بوسة في حياتي

كان عمري 34 سنة..لألألأ.. دماغكم ما تروحش بعيد، ده مش عمري مع أول بوسة في حياتي(وده مش عمري دلوقتي انا لسي صغير 18 سنه)، ده كان عمري لما أمي جت زارتني في مكتبي، واتلمت عليها شلة الزملاء في المكتب، ويا أهلاً يا طنط ونورتي يا طنط، ده الأستاذ أحمد شبهك تمام يا طنط.

وابتسامة أمي قاربت ما بين السماء والأرض.. وظبطت نفسها في الكرسي، وأخذت نفس عميق بعمق الذكريات، وأدتني إحساس الملكة اللي قاعدة وحواليها العبيد والجواري.

إدوني كوباية ميه ساقعة.. ده طلب من أمي تم تنفيذه في التو من إحدى الزميلات.. وفكرتني أمي بشريفة فاضل وهي تحاول أن تقول: طبعاً ما أنا أم البطل.. والبطل ده اللي هو حضرتي طبعاً.. علشان أنا ابنها مش علشان أي حاجة تخصني.

وقالت: تصدقوا يا ولاد لما ولدت أحمد كان قبل العيد الكبير بكام يوم) بحسبة بسيطة اتضح أنني مواليد 6 ذو الحجة 1386هـ ) وولدته بالليل بس الساعة كم بالضبط مش فاكرة ؟!

فاكر يا أحمد أنت اتولدت الساعة كام.. وزي الأفلام العربي رفعت رأسي وقلت: بشرفي يا هانم مش فاكر.. والبنات والشباب حواليا قالوا يا طنط يفتكر إزاي ده كان لسة مولود.. و بطريقة من يسخر من عقول البنات والشباب الساذجة والتي لا تستطيع أن تستوعب عبقرية إنسان مثل ابنها منذ اليوم الأول قالت: لأ إزاي بقى ده اسم النبي حارسه وصاينه ذكي ونبيه وناصح من يومه.. واضطر الزملاء والزميلات أنهم يصدقوا عبقريتي بناء على نصائح وتوجيهات الست كوندانفيسة اللي هي أمي.

بس اللي حصل بعد كده لا يتحكي ولا يتكتب ولا يتقال.. أمي بصت على وقالتالي بعيون كلها خبث ولؤم: وفاكر لما بوست زميلتك وبعتوا جابوني وقالولي إنك بوست زميلتك.. بهذه الصيغة أمام خمسة من البنات العذارى.. وعن واحد بيثقوا فيه.. يا نهار اسود. بوست زميلتك.. وبعتوا لأمك.. يا نهار مجازر وإحنا اللي فاكرينك خضرة الشريفة. بوست زميلتك وبعتوا لأمك.. وإحنا اللي كل شوية رايح فين يا أستاذ سيف، رايح أصلي.. جاي منين يا أستاذ سيف.. كنت في الجامع.. بوست زميلتك وبعتوا لأمك.. دلوقتي بقى ورينا جمال خطوتك.. رايح فين يا كازانوفا.. رايح أجيب أومو..جاي منين يا كازانوفا.. كنت باجيب أومو.. ليه يا كازانوفا.. علشان نطهر المؤسسة من أمثالك !

طبعا لم تستطع واحدة من البنات أن تنطق بأي كلمة مما سبق.. بس ده كان حالهم.. وواحدة منهم فضلت تبص علي من فوق لتحت ومن تحت لفوق لما اتحرقت في مكاني.. وتحول وجوههم من اللون الوردي المرحب بالست كوندانفيسة إلى اللون الأصفر المخضوض، ومن اللون الأصفر إلى اللون الأسود المنتقم وتحياتي يا كل أفلام بروس لي.. وأنا طبعا صرخت في أمي: إنت بتقولي إيه يا حاجة.. زميلتي مين؟ يا نهار اسود!!
وقالت: ما تكسفش ما تكسفش دول زي أخواتك، والله يا بنات كان شقي شقاوة، هئ هئ لأ ولسة شقي.. مع نصف ضحكة أعرفها من أمي لما تمسك علي ذلة.. شقي أوي هو باس زميلته من هنا وراحوا بعتولي على طول.

بس بس بس.. طبعاً بس هنا ليست بس التوقف ولكنها بس الاستعطاف والرحمة.. زميلتي مين يامه.. أبوس إيديكي.. ولا بلاش أبوس إيديكي.. أقولك بلاش أبوس خالص.. بس و النبي ورحمة ستي وجدي مين زميلتي دي.

قالتلي فاكر لما كنت بتروح الحضانة اللي في حارة اليهود وانت عندك أربع سنين وبوست البنت اللي جنبك في الفصل والمدرسة بعتت وقالت لي ابنك باس زميلته.. أربع سنين.. يا جماعة أربع سنين.. إحياة النبي أربع سنين.. أربع سنين أحمدك يا رب.. أربع سنين يامة وعملتيها غنوة وحدوتة.. ويا جرادل المية الساقعة انهمري.. ويا شلالات نياجرا أهدري.. بتقولك أربع سنين.. الله عليك يا حبيب والديك.. وبحبك يا أبو تريكة.. وبحب الدنيا كلها.. الحمد لله كان عندي أربع سنين.. يعني عيل.. كنت عيل.. يعيش العيال وعمايل العيال.. بوستها لما كان عندي أربع سنين.. وبعدين تبت من بعدها وعملت عمرة.. وبطلت بوس خالص.. وكمان خليت أمي تبطل تحكي ذكريات عني بالطريقة دي.. وفكرتني بأغنية: يا ماما ستو احكي لنا حكاية بس اوعي تطلع قصيرة.. والتي تنتهي بفعل فاضح من الجدة.. حين تأمر أحفادها بهذا الطلب الفاحش: طب حزموني وسدو الشيش واتفرجوا على رقص زمان آه يا ترللي يا يللي آه يا ترللي يا يللي يا عين.

والحكاية ببساطة، إني كنت دخلت الحضانة وأنا عندي أربع سنوات، ولما كبرت اكتشفت إن الحضانة على بعد 5 كيلو من بيتنا يتخللها تعدية شوارع الأزهر وبورسعيد والموسكي ومكسر الخشب وعم أرتين الأرمني بتاع سندوتشات البسطرمة.

ولما دخلت الحضانة كنت قاعد على الدكة لوحدي.. أوم جت "أبلة سعاد" قبل اختراع مصطلح ميس.. وجايبة في إيديها بنت سبحان من صور.. وجه ولا القمر ولا كل الكواكب.. وعيون زرقا. لم استمع إلى نصيحة محرم فؤاد : أوعى تكون أم عيون زرقا ماحدش اد النار والفرقة.. وكعادتي في عدم سماع سيف إلى سيف.. لم استمع إلى تلك النصيحة الجوهرية.. وظلت عيوني متعلقة بذات العيون الزرقاء ويخرب بيت عيونك يا عالية شو حلوين..

وقالتالي أبلة سعاد اتاخر يا أحمد علشان البنت تقعد جنبك.. ويا صباحو اللي زي الفل.. جنبي.. دي لو مشالتهاش الأرض تشيلها عيوني.. وقمت فزيت من على الدكة.. وقعدت البنت جنبي.. وهي ساكتة خالص.. ونزلنا الفسحة.. بس هي كانت خايفة من زحمة الولاد.. وأنا طلعت فوق نخلة كانت في المدرسة..( شقاوة أدت إلى كسر ظهري في الكبر).. والبنت كانت واقفة تحت بتعيط وهي بتقولي : انسل انسل هتقع.. ونزلت.. وعرفت إنها خايفة من زحمة المدرسة.. قلتها انت اسمك إيه قالت: منى.

قالتلي تيجي نلعب سوا.. وادتني سندوتش طعمه كان غريب جدا.. قلتلها ايه ده يا منى.. قالت لي: هاي زعتر بالزيت.. وأنا ولا فاهم حاجة.. المهم لقيت سندوتش لأن عم أرتين الأرمني بتاع البسطرمة كان قافل في اليوم ده.. تاني يوم قلتها خدي مني سندوتش بسطرمة.. قالتلي لأ أنا جبت إلك سندوتش زعتر زيادة.. ايش هنلعب اليوم.. قلتلها أنا باعمل طيارة ورق.. وعملنا طيارة ورق.. قلتها بيتكم فين.. قالتلي في فلسطين.. فين فلسطين دي؟ بعيدة.. مش مهم بعيدة ولا قريبة.. قلت: في الإجازة تاخدي الطيارة دي وتروحي على فلسطين وانت طايرة بيها..قالت: أبوي بيحكي مش راح نعود على فلسطين.. بس أمي حكت.. إن شاء الله بنعود.. وأنت يا احمد تيجي معاي علشان تسوق الطيارة.. ووضعت يدها على كتفي.. ووجدتني أطبع قبلة على خدها..

وفي اليوم التالي لم أر "منى" وحتى تلك اللحظة لم أراها.. لكني لم أنساها أبداً ولا نسيت عيونها الصافية ولا الزيت ، والزعتر ، والطيارة الورق.. ولا نسيت فلسطين.

أحمد اسماعيل · 02-07-2008, 08:47 PM

هههههههههههههههههه ..... قصة روعة وعنوانها يجذب بسرعة

شذى القلوب ... المميزة بالطرح الجميل

تسلمى على القصة الحلوة

أنسل . أنسل هههههههههههه

يسلمووووووووووووو