درب الدرك
لو فيه كلمات صعب فهمها
اتمنى زائر سودانى يفسرها لنا
يا حليلك يا الأمانك من صباحك للمغيرب ..
من شموس حاضر زمانك لي ظلال زكراك هارب ,,,
صغير كت أروتي السواقي ..
براك فوق التكم شايل المطيرق ..
منو البقدر يبلغ إشتياقي ..
ضليل دومتأ ورا بيت بت إزيرق ..
و كواريك شفع المغرب ملاقين المراكب ...
حجا حبوبه ساعة أحرد عشاي ...
سلامتك أنت يا دخري القبيله ....
بريدك أنت يا عكاز عماي .....
صفايح الجوز عليك لسع تقيلي ...
ضراعك يا الخزين لي اليلي غايب ...
جري الترتاره في درب اللواري ...
متل زولأ ورا المحرات يتيرب ......
نزول بنوتنا في ساعة العصاري ..
و طويراتن يورجقن المغيرب ...
يودعن النهار الولي هارب ,,,,,,,,
صياح حبوبة في غسق الليالي ....
تعال يا يابه أطلع عنقريبك ....
تعال يا الأنت أصلك مابتبالي ...
بخاف الشوك يصادفك في دريبك ...
غصون الشوك ولا لسع العقارب ....
دليب التركي ينقر في جريفنا ...
عجاج الحفله في نور الرتاين ...
صفوف الناس مدوره زي صريفنا ...
قصير القامه ما بقدر يعاين ...
يفج في الناس يدافر ماهو هايب ,,,,,
عصاية شيخنا و اللوح والدوايه ...
قراية الخلوه قبل الإبتدائي ...
بليلة العيش عشان رفع البلايا ...
حرارة الحمي في الصيف والسحائي ...
وقايتأ تبقي من تالا المصايب ...
تعال فوق النخيل يا قمري قوقي ...
بحرسك في مسايا و في صباحي ...
عشان يمكن تبل في الزايله شوقي ...
جمال الريف مع قمر الضواحي ...
نشوف في وجهو رمزأ لي الحبايب ...
عشقناك يا بلد ساعة الدميري ...
عشقناك و النجوم نواره فاقع ...
عشقناك في شتاك وفي الهجيري ...
عشقناك يابلد والبدر ساطع ...
سلامة البدر من شر الكهارب ,,,,,
سلامتك والشمس يا الماتغيبو ...
صغار من قمنا نمرح في ضياكم ..
متين قطعونا أو قالولنا جيبو ,,,
فضايل خيرنا كلها من شعاعكم ...
مغالبنا الزمن و المولي غالب ,,,
</b></i>