ديوان الشاعر فهد المساعد

[نور]

قصيدة / لحظة الفرقا

اليوم صوتي يناسب لحظة الفرقا
كانك تبينا نتفارق .. خلها الليله

من ينتظره الشقى .. لو ينتظر يشقى
دام الشقا ينتظرني .. ليه ماجي له ؟!

ياقلبي المنتظر .. مكتوب لك تبقى ..
محروم حتى من اللي كنت تشكي له

خل المراكب تسير ..و ودع الغرقافي
موادع الحمل .. راحة من هو يشيله

اللي يدور عذر لفراقي .. بيلقى
يامن نويت المفارق .. قبل تمشي له ..

أرحل من احلامي اللي قلت لك ترقى
ومن روحي اللي ماعاد اعرف من هي له !!

ومن دفترك .. وأرتباك خطوطه الزرقا ..
ومن كل ضحكه , ودمعه .. في تفاصيله

أرحل .. و خذ ذكرياتك معك .. لاتبقى
ساعدني أرجع لنفسي كان لك حيله

علمتك الوصل .. علمني على الفرقا
محتاج لي قلب .. يشبه قلبك .. الليله

[نور]

قصيدة / آخر الصيف

تغيرت بنت الضلوع المهاديف
تغيرت والله .. وانا في رجاها

مدري متى ؟! أو وين ؟! أو ليه ؟! أو كيف !؟
لكن اعرف أنه تغير غلاها

هي سلمتني للزمن والصواديف
وانا اتذكرها .. ولا اذكر خطاها

شهور .. كن غيابها في الصدر ضيف
مافيه ضلع ماتقوس وراها

حاولت فيها ترجع .. وقلت : ياحيف
هو من متى والأرض تنكر سماها ؟!

كم كان وجه الحزن في عيونك مخيف !
كم كنت أواسي دمعتك في شقاها !

نسيتي أمواج الزمن والعواصيف ؟!
وضلوعي اللي كم غفيتي وراها

ودعتي البحر .. ورميتي المجاديف ؟!
من وصلك هذي الشواطي سواها ؟!

ياما كتبتك فوق روس المشاريف
قصايد مر السحاب وقراها

ويوم المطر مرت عليه السواليف
حول يبي ضحكتك تسقيه ماها

وياما انجرحتي من فراق المواليف
وقسوة قلوب الراحلين وجفاها

طيب علامك كل مارسلت لك طيف
عود علي بدمعة مابكاها !!

حقك عليه يالعروق الملاهيف
دام السوالف واصله منتهاها

الله عطاها من هنا لآخر الصيف
إن عودت للقلب .. والا نساها

[نور]

قصيدة / الريح والناي

ليلة فراق و برد و بروق و رياح
وصوت المطر يفصل اخطاها عن خطاي


نقرب .. وتنبت فالوطى بيننا رماح
حتى تلاقينا..لقا الريح والناي


آخر لقا يغزل من الغيمة وشاح
وأول لقا يمضي .. بلا موعد جاي


مسحت عن وجناتها صبر وجراح
وأنا جراحي كانت أكبر من بكاي


قلت أذكريني ماهما بارق ولاح
وأياك تبكيني ترى الدمع نساي


إذا سألوك الناس .. قولي لهم : راح
بالك يجي طاري وداعي وفرقاي


ترى الفراق الموحش .. فراق الأرواح
أما الجسد لو غبت تحييه ذكراي


صدت .. و في وجناتها الدمع ذباح
وأنا أعتذر لعيونها عن سواياي


تبكي وأنا أمسح دمعها كل ماطاح
كنت أحسب كفوفي بتمسح خطاياي


لو اجرحتني وقتها .. يمكن أرتاح
لكنها.. وبدون كلمة ولا راي ..


أقفت تودع عمرها اللي معي راح
وأقبلت أودع عقبها عمري الجاي

[نور]

قصيدة / شعار جيلي

أحد طموحه من قصايدة خوه
و أحد طموحه خوة الجدي وسهيل

أناأشهد إن الشعر تالي تشوه
شعار جيلي شوهوا سمعة الجيل

ما بين شيخ يحفظ الله سموه
ريشه ضعيف وطيروه المهابيل

ومابين شحاذ بليا مروه
لوأبرههعايش مدح عنده الفيل

والمشكله حتى الخطيب المفوه
اليوم جازت له لحون المواويل

وأعلن على محق القوافي غلوه
مايدري أن حتى الشعر فيه تسبيل

ناس ضعوف و تحسب الضعف قوه
يطري علي لا شفتها كذبة أبريل

حتيش لو هي في المناصب تبوه
ما طهر الماء حنظلة وادي النيل

وأن ظن منهم واحد أني عدوه
تكفون قولوله ترى ظنه خبيل

قاع الجبل ما ينحسد من علوه
للي يعرف الحصن من كدش الخيل

لكن كذا لله حبيت أنوه
و أقبل مثل فجر فهق عتمة الليل

يوم إن كل يفتخر له بخوه
أنا خوي الشعر والجدي و سهيل

[نور]

قصيدة / جماهير نواف

الله عليكم ياجماهير نواف
أثبتوا الليله وفاء الجماهير

الله يانادي القرن نشكرك بإسراف
كرمت الاسطوره يانادي الاساطير

ونواف يستاهل بلا شك وخلاف !
فن , وحسن خلق , وتواضع , وتقدير

لاعب جمع كل النوادي والاطياف
جينا لوداعه فوج فوج وطوابير

والله نحبه حب صادق وينشاف !
ونواف مايحتاج حبه لتبرير

رقم احدعش يعني المهاره والاهداف
الله يذكر صاحب الرقم بالخيير

انتر ميلان لو عندكم مثل نواف
عذرتوا الليله عيون الجماهير !

[نور]

قصيدة / نادي القرن

أناهلالي بالهوى ، والمشاعر
لكن ترا مانيب شاعر هلالي


شاعر بكل الناس والكل شاعر
بإحساسي الصادق وشطحة خيالي


اهيم في الوديان وارحل واسافر
مع كثرة الشعار كني لحالي


احيان اشوف الحب مشرك ، وكافر
واحيان اقول الحب هو راس مالي


لكن اذا حبيت ماقدر اكابر
كتمان هذا الحب فوق احتمالي


واللي يعد الصدق ماهوب خاسر
قد قلتها واقولها اول وتالي


احب نادي القرن واحب ياسر
واحب كل انسان دمه هلالي

[نور]

قصيدة / الأماكن

ياهلا بك يابعد كل الأماكن
شبه كامل وإتصالك كملك

هاتفي من قبل رقمك كان ساكن
وبعد رقمك يابعدهم فز لك

الرسايل كم على أسمك تباكن
أنت تدري حتى لو ماقلت لك

والغلا لك في حنايا القلب ماكن
توجك قلبي على ظلوعي ملك

مو أنا اللي بس لك مشتاق لكن
الأماكن كلها مشتاقه لك

القصيدة / للاستماع و التحميل

7
7

هنا..*

[نور]

قصيدة / باب النسيان

كل مافي الأرض ينذر بالمفارق والغياب
اللقا .. والشمس .. وحروف الرسايل .. والقبور

وش بقى يوم أكتشفت أن آخر الدرب السراب ؟!
والبحر دمع لسواحل هاجرت عنها الطيور !

مالحزني صوت ؟ .. مدري هو خطأ والا صواب !
بس أعرف أني حزين وصوتي الليله جهور

من يدثر صوتي الليله ويكسب له ثواب ؟!
مالها يالشعر غيرك أنت .. ياجبر الكسور

يكفي أني .. لابكيت بدونك أشعر بإرتياب
وكل ماأبكي فيك .. أشوفك لي .. عن اللي في .. سور

أدري بيوتك عرايا .. لكن أوزانك ثياب
لبس جروحي من أحزانك وألبسك الصدور

كان ياما كان والنسيان للعشاق باب
عاشق لاشد درفة باب .. صاح بلا شعور :

يقدر النسيان ينزع غصن من فوق التراب
بس مايقدر يقرب للتراب وللجذور

كيف أبنسى ذكريات الطيش الأول .. والشباب
ورفقة الليل العتيقه .. وأول الفجر الطهور

والمواعيد وشغبها .. والوله قبل العتاب
وساعة كم كنت أحاول في عقاربها تدور

والمكان اللي وهن سقفه من الفرقا وشاب
من بعد ماكان يحضنا مثل طفل غيور

والمطر لا لون الشارع .. وقلنا للسحاب :
بلل أيدينا .. ترى العشاق أياديهم زهور

كيف أبنسى والرياض لسيرتي مثل الكتاب !
حافظتني بيت بيت .. و حي حي .. و دور دور

من كثر ماكنت أدور في شوارعها جواب :
هو صحيح الحب أعمى ! أو عيون الناس عور ؟!

كنت أشوف الحب عذب .. وهم يشوفونه عذاب !
كان هذا الحب سر ! .. وقلته وكلي سرور

علموني في المدينه كيف لاحبيت أهاب
لكن القريه قمرها قال : كن للحب نور

في بلادي كنت عاشق .. بس شاعر بإغتراب !
لين صرت الشاعر اللي تعشقه كل البحور

علميني يالقصايد هو خطأ والا صواب ؟!
لارفضت أنسى عيون عشتها شعر وشعور

هذا أنا لحالي .. هزيل الحال .. وأشعر بإكتئاب
كن قلبي جال بحر هاجرت عنه الطيور

أجرع الفرقا وأقول الحب عذب .. وللعذاب ..
كل قلب لاحرمه الوقت من خله .. يبور

ولين هذا اليوم أدور في المدينه عن جواب :
ليه في شرعك .. يكون الحب معنى للفجور ؟!!

[نور]

قصيدة / الدكاتر

حاولت اذاكر بس ماقدر اذاكر
أقرأ وجهك في الكتب ينرسم لي

عذرا عميد الجامعه والدكاتر
هذا نصيبي والله اللي قسم لي

يعني وش تسون لو غبت باكر؟!
ورجعت لديار ترد النسم لي

يحسم على؟ كانه على الحسم شاكر
معدلي فدوه لها لا انحسم لي

ياقلبي التعبان قص التذاكر
مشتاق اشوف عيونها تبتسم لي

[نور]

قصيدة / الوصية

يالضلوع اللي على قلبي تواما
ريحيني ماحصل مني خطيه

الخطا والله في حق النشاما
الرجال أهل الشدايد والحميه

الخوي منهم يضيق ولا يناما
لين يدري وش بلا ضيقة خويه

تقعد الدنيا وتقوم ولا يضاما
واحد منهم وشمس الكون حيه

مثلهم يشري عزيزين المقاما
مثلهم يفدى لو العمر الفديه

والا ذاك ان شاع ذكره وان تساما
والله اني خابره راعي رديه

ذاك ياما شلت زلاته وياما
قلت: عادي حتى لو يخطي عليه

صاحب وحقه على مثلي الاما
ضاقت ايدينه فزعت له بيديه

كانت جروحي من طعونه تداما
وكنت أحمل نفسي حمول قويه

لين شفت العمر قدامه ترامى
وصد عني مانشدني ويش فيه؟

يحسبني باتجاهل واتعاما
مادرى اني حافظ ذيك الوصيه

يوم ابوي يقول والعالم نياما
ساعة فيها المواجع سرمديه

ياعيالي حتى لو صرتوا يتاما
المعزه تورث النفس الغنيه

يالله اجعل منزله برد وسلاما
واجعله في عدن يارب البريه

يوم راح وهرجته فيه تناما
يوم مات وذمته كانت بريه