قصيدة بلا بداية ...
وين أدور في حروفي عن مكاني ؟
كيف أبنهي هالقصيد بلا بداية
شاقني للهم إحساس المعاني
لو بقى لي من أحاسيسي بقايه !
الحزين اللي من اجروحه يعاني
ما درى باللي تعشعش في حشايه
هو بقى للحزن درب ما مشاني ؟
لا ولا حتى قدر يلحق جزايه !
ربي اللي قدر القسمه عطاني
حظ يشبه زول وجهي ف المرايه !
ما شغلني من حسود لو وشاني
قد تعودنا على سمع الوشايه
هل دمعي قبل لا أبكي ، بكاني
قبل يفضحني ..سترته بالعبايه
مشهد التوديع عاقد لي لساني
والأمل فيني يلوح بالنهايه
وش رجيت من العمر لا صار فاني؟
ما وصلني من غرابيله كفايه !!
الهوى طماع و العاشق أناني
و الوفا دايم نردد به حكايه
ذي حياتي كلها صارت أماني
إنتهت في فصل حب من روايه
لا تقولوا فيني الإحساس ثاني ؟!
عفت أنا بعد المشاعر كل غايه !
ليت شعري ما كتب صادق حناني
لين يعرف دفتري معنى القرايه
من يبي يلقى قصيد في مكاني
يرجع لشعري ، يدور له بدايه ...!!
قصيدة مواويل الملل ...
ما ذقت للراحة طعم، من عقب هذاك الزعل
إكذب و قل لي يالغلا .. إنك على قلبي رضيت !
ليتك تحس بهالألم ، لا من سلب مني الأمل
ما ظنتي باقي عطا .. بقدر عليه و ما عطيت !
البارحه جاني نغم ، يقطع مواويل الملل
في نغمته يبكي بكا .. يومه بكا عندي .. بكيت !
أشكي سواتك للنجم ، و اشوفه بعيني : نزل !!
و من شافني وسط الملا .. كني أبد ما قد شكيت !
إني أحبك إي نعم ، ما قلتها.. قصدي خجل !
يا كيف تجزاني جفا..إرحم طعون اللي جفيت !
ما قلت أبي منك وهم ، يكفيني ماجاني علل
أبيك بس إن جا وفا .. تذكر بأني لك وفيت !!