ديوان شعر بدر بن عبد المحسن

[نور]

(( مـــــوت وميــــــــــــــــلاد ))






قصيدة في رثاء سماحة الشيخ عبدالعزيز بن باز ( رحمه الله )

وقد اسماها البدر بــ (( مشعل الدين ))



ماد صرح السماحة وانهدم
طبت حي .. وميتٍ يالعلم
مشعل الدين يابحر التقى
قلعة العلم يانهر الشيم
مبصر القلب يخشاك الظلام
كف شوفك وبصرت الأمم
جتك الأيام بأغلى كنوزها
رامك التبر واخترت القلم
وجتك الأيام والفجر الخميس
كنت روحٍ تصلي في الحرم
سيد الزهد سلطان السماح
طاغي اللطف مبذول الكرم
والله ان لك من الفضل الغزير
كثر مافي المقابر من رمم
جود ربي وعطفه والفلاح
للذي صانها قلبٍ وفم
وخلده ربي وريفه والظلال
للذي شال للإسلام هم
ونور ربي وفضله والرضى
للذي ما رضي سفكٍ لدم
مات بن باز كل حيٍ يموت
ووجه ربك هو الموجود تم
ندعي الله بحسن المعاد
طبت حيٍ وميت يالعلم

[نور]

(( لا تعاتــــــب ))




لا تعاتب .. ما اقدر أتحمل عتابك ..
قلبي ذايب .. وانت تشكي لي عذابك ..
بس لو تسأل عيوني .. راح تبين لك شجوني ..
لو أغير يوم حياتي .. عن هواكم ما تغير ..
إنت أغلى ذكرياتي .. انت غيرك ما اتخير ..
بس لو تسأل عيوني .. راح تبين لك شجوني ..
لا تعاتب .. لا تعاتب ..
نور حياتي في رضاك .. والسعاده كلمه منك ..
شوف هنايا في هواك .. لما نلتوا بحسن ظنك ..
بس لو تسأل عيوني .. راح تبين لك شجوني ..
لا تعاتب.... لا تعاتب ..

[نور]

(( لا تعاتــــــب ))







((ارقام ))


في آخر الصفحه .. يسار ..
خبر صغير .. حادث قطار .. مات أربعة ..

مكتوب في السطر الأخير ..

باقي التفاصيل .. في الصفحة العشرين ..

على الثرى .. وبين الورق ..

أجسادهم امقطعة ..

الأربعة .. لجل المساحة ماتشيل ..
وفي باقي الصفحة صور ..
فنان .. وحصان .. و كور ..
وابحث عن الخبر الحزين ..
في نهاية الصفحه يمين ..
حادث قطار ..
ماتوا ثلاثة وطفل ..وباختصار .. شديد .. شديد ..
كان القطار .. هو الوحيد ..
اللي بأسم ..
بلا ملا مح .. أو أسامي ..
ليه كلنا نموت ..
ليه نهمل الجثه ..
ونتذكر التابوت ..
لأقدامنا صوت ..
من يسمعه ..
من يسمع الأقدام..
هم مروا من تحت الكلام..
الأربعة ..
وصاروا أرقام .. أرقام ..

أنا رقم .. اصقه ضرير ..
المشكلة .. مثلي كثير..
يجمعنا حب الهاويه ..
احلامنا .. انا نصير..
وقاماتنا متساويه..
نركض على ورق الحياه ..
لين ننمحي ..
المشكله مانستحي ..
إنا نمرّ ..
ماشافنا انسان ..
ولا سمعنا انسان ..
اكتبني يالنسيان ..انا رقم ..

[نور]

(( مجنـــــونـــــها ))


لعيونها ... بس لعيونها
قلبي سراب بدونها ..
قلبي سراب ... وعيني سراب
ما اقول أعشقها بعقل...
مجنونها...


البارحة مريت في أحلى الفصول
صيف وشتاء..
وناظرتها..
وقلبي يقول هذي العيون إلى متى
حبيبتي ياكثرها عيونك على هاالليل
وين ما التفت اشوفها ..
حبيبتي يازينها عيونك على هاالليل
سحرني برق سيوفها..
ما أقول أعشقها بعقل..
مجنونها..


قمري .. يا شمس الذهب
سفري وراء عيونك تعب
قلبي تعب... وصبري تعب
ومن الهدب لين الهدب...
بحر ومراكب من لهب
أمواج تبحر برضاه ..
وأمواج تلعب بي غضب

[نور]

(( الجدران ))

المنزل ثلاث جدران .. ورابع ..
ما بينهم ضايع .. متشقق وعاري ..
ويميزه شباك .. ضيق ..
مصبوغ.. بالأحمر الناري ..
ومحاصرٍ باسلاك .. علقت بها وردة ..
أوراقها المنزل .. والبرعم الأفلاك ..
( * )( * )( * )( * )*
وعلى الجدار الثاني ..
وأمثال .. وأغاني
مكتوبة بكسرة فحم ..
وصندوق خشب ..
مزخرف بغير الذهب .. غير الجواهر ..
تحت الكتابه نافر ..
فوقه ظلالٍ عريق ..
مثل العنيد .. من الجروح ..
مثل السيوف اللي مقابضها حديد ..
أسرار من ماتوا بعيد ..
وما خلفوا حتى الورق ..

( * )( * )( * )( * )*
أما الثالث من الجدران ..
معلقٍ عليه صورة .. لإنسان ..
من دفتر نفوس .. مكبره ..
مدري جفونه مبخره ..
ولال تجاعيد خيوط .. دخان
وفي الركن كرسي خيزران ..
يجلس عليها الوقت ..
وجريدة ٍ عنوانها باهت .. تغفى على الإسمنت ..
وفوقها كوب فارغ .. وفتات خبز ..
وأصابع ٍ للجوع صفرا مكسره ..

( * )( * )( * )( * )*
ويبقى الجدار الأول ..
وهو أعرض الجدران .. وأكثرها وقار ..
وهو الوحيد اللي انبنا فـ نور النهار ..
بوابته على الطريق الرملي ..
صَفت أحجار درجها .. بصبر ..
وش كنها .. ؟؟
سنونٍ صفر .. في فمٍ مذهول ..
وظلما تشدك للدخول .. تشدك ..
وكل ما مسكت اكرة الباب النحاس بيدك ..
تلطخت بدم ٍ طري ..
الجرح نزفٍ يحتري .. أما الطعون ..
وين الطعون .. راحت ..

( * )( * )( * )( * )*
البيت ثلاث جدران .. ورابع ..مالهم طابع .. يجمعهم ..
يشبهون أهلهم ..
وما صادفوا غير الحياة ..

[نور]

(( المــــــــــرايا ))



المرايا.. وجهي اللي تمليت
آه يا وجه المرايا ..
انت انا .. والا سوايا ..

محدٍ خذا وجهي
لبسوني قناع ..
وانت .. لا تسال .. ولا ترتاع ..
كدر حصاهم صفحة الما ..
لا ياصلون القاع
أعرف أنا نفسي
بس ودي تقول .. من أنا
إلى متى صمتك يطول .. مين أنا
كلٍ يسميني بإسم .. ما هو اسمي ..
وانت تناظر .. تبتسم ..
آه .. يا وجه المرايا ..
لا انت أنا .. ولا إنت سوايا

هذا وجهي يالمرآة .. ورده وصارت حصاة
قمت أقلبها بنظر .. وآه يا كثر الحصى
ذا حجر .. وذا حجر ..
وينك إنتي يالصور ..
ذكرىوجهي اللي فات .. وجهي الباقي
اللي في أعماقي .. وجهٍ عرفته غير ..
آه .. يا وجه المرايا ..
إنتي أنا .. وأحدٍ سوايا ..

[نور]

(( اقول أحبك ))

قالوا حروفي عمي وعيونك بروق

مافي قصيدي جنح ليلٍ وبارق

قلت الذي له داخل ضلوعي حروق

أقرب من اللي في سما الناس شارق

غيري يشوفك وأجود الشعر مطروق

وأنا أحسـّك وأصدق الحب فارق

ياللي عيونك دم وعيونك عروق

ولهاث قلبٍ فـي نواعسك غارق

أقول أحبك يخرج البحر صندوق

تبرالغزاة وكنز سود البيارق

وأقول أحبك صدرالايام مشقوق

عن وجه غرناطه وعن مهر طارق

وأقول أحبك والله إني من الشوق

ألقا طيوفك في جميع المفارق

كتبت لك قلبٍ من القلب مسروق

ولا طاب لي وصفٍ من الوصف سارق

[نور]

((الشمس اللي تغيب ))

أركض ورا الشمس .. اللي تغيب ..
ابي النهار .. وينتحي ..
أخاف أنا وجهي الى طاح الظلام ..
فوق الملامح .. ينمحي ..
كافي سواد العين والظل الحزين ..
وشمسٍ تبين .. وماتبين ..
ورا السحاب ..
كافي بَعْض ليلٍ يجي .. قبل الغياب ..
عن ليل الغياب
يا موقد الشمعة ..
وجهي أنا .. أو نور ذا الشمعة ..
قاسي الشحوب ..
في رعشة الضي العليل ..
وتكبر مسافات الهروب ..
يا صاحبي الشمعة غروب ..
به قريةٍ .. تحت الظلام .. مريتها ماجيتها
وبنيةٍ .. تحت الظلام ..
ورسالةٍ في الليل ..
خانتها الحروف .. من القهر شقيتها ..
كلي عيون .. وماتشوف
والناس .. ياظل .. وطيوف ..
والظلما .. نسيان .. الحبيب .. لحبيب ..
أركض ورى الشمس اللي تغيب ..

[نور]

الليالي الوضح


الليالي الوضح .. والعتيم الصبح ..
بان لي وجه الرياض ..
في الليالي الوضح ..
والعتيم الصبح .. لاح لي وجه الرياض ..
في مراياالسحب ..
بكفها فلت جديله من حروف ..
وقصة الحنا طويله في الكفوف ..
من نده عطر الرفوف ؟! ..
لين صحاه في ثيابك ..
وفي الهـبوب ..
أنثنينا.. ياهبوب النعاس .. والحلم .
. ألف غصن من اليباس..
فز.. لاجلك وانثنى ..
اكسري الأوهام.. كأس.. والمواجع.. فم..
وان عشقتيني انا..ماأبي من الناس ناس ..
ماعلينا لو طربنا وانتشـينا..
آه ماأرق الرياض تالي الليل..
أنا لو أبي .. خـذتها بيدها.. ومشـينا..

يانصيبي من الصور .. والرسايل ..
ومن كل شمس قايمه .. ومن كل ظل مايل..
يامكاني من البيوت.. ومن الصحاري
اللي فرقت فكري.. قبايل..

وين أحـب الليله .. وين أهيم ؟؟
اقبلي مثل ديم .. ومثل نار في هشيم..
في غصون الضي .. من ليل الغضا..
وبين ماخلا النخيل من الفضا.. ومانسى الغيم..

اقبلي .. يابخت
لي عيوني من الربيع..
وطل وجهي من الشتا..
ومثل صوتي من الهبوب..
اقبلي مثل الرياض .. من تعاريج الدروب..
في ضلوع الوادي .. وين حبيتك ..
قمر ..فوق طين اجدادي..

أرفعي طرقة الشيله عن سـديم..
وكوكب وهـاج .. وأقطعيني بنصل ..
طرف سـادر وحجاج ..
شـقـقيني .. يالهبوب العارضيه
.. واهـدميني سـياج ..
لين أغني .. الهوى ماهـو خطيه
.. آه ماأرق الرياض ..

[نور]

(( الولــــــــه ))


يطري عليه الوله .. وأطري على باله
يامرحبا لاضوى خلي على بابي

هجيت حدب الضلوع ونوخ جماله
لاجله بكت دمعتي ولأجله ضحك نابي

وكل ما ضحك لي لمحت النور في آماله
والى تجهم سترت السقم بثيابي

وكل ما شكى من عنى همه وغرباله
أقول لعل به جرحٍ من أسبابي

طال الحكي ما لقيت الوصل بوصاله
لاني حبيبه ولا هو أقرب اصحابي

ناديت طاري المحبه مالنا وماله
بالحيل أنا وانت ربع وكننا أغرابي

يا زين كانك حزين .. فحالتي حاله
بكفيك همك وأنا بصبر على مابي

لو الشجر له نصيب فـ بارد ظلاله
ماحرق القيض جفني وأنت فـ أهدابي