قصائد للشاعر محمـد أحمـد السديـري

[نور]

محمـــــــد أحمــــــــد السديـــــري






انا وخلي




أنا وخلي كل دار وطنا
عيني وقلبي كلها له هديه

لو التمني ينفع اللي تمنا
ماكان صرت اليوم نفسي شقيه

اشوف كلن مع حبيبه تهنا
وانا حبيب الروح صعب عليه

أنا وخلي كل دار وطنا
عيني وقلبي كلها له هديه

قلبي بحبك ياحبيبي تعنا
ارحم يعل ايام عمرك هنيه

انا وخلي كل دار وطنا
عيني وقلبي كلها له هديه

ان كان سيد البيض بالوصل منا
خطيته ياكبرها من خطيه



.................... .................... .......... .................... ....




صبر وجلاده



حياتي كلها صبر وجلاده
وغيري عايش عيشه سعاده


أنا اللي عاشق بالغي مغرم
غريق في هوا راع القلاده


بعيد عنه بديار بعيده
ولحد جاب لي منه الإفاده


يجيبنه حلوم الليل عندي
وحط الخد للغالي وساده


وإلى مني صحيت وقمت أراعي
ولين الليل يفجعني سواده


تصور لي عزيز ما نسيته
حبيب ما سلى قلبي وداده


عذولي لا تلمني بالموده
جريح هايم في حب غاده


تهل الدمع عيني من عناها
وسفك الدمع للعشاق عاده


نشدت أهل الموده وارشدوني
يقولون الهوا صعب جهاده


أقوله مصخر من روح روحي
حياتي كلها صبر وجلاده



.................... .................... .......... .................... ..




كذبت



كذبت يوم أنك تقول أني أخطيت // وخطاك والله ما يعدد حسابه



ظلمتني ياعزوة الحي والميت // وكذبك على اليوم كلٍ درى به
..
..
ياما على شوفة خيالك تشافيت // وقلبي كفاه من الغرابيل مابه
أن شفت غيرك صدت النفس وغضيت // لو هو يهلي قلت له لا هلا به
..
..
إن كان شفتك فز قلبي وهليت // وربع محيل القلب وأزهر جنابه
دنياي تضحك بالسعد كل ما جيت // وقلبي من الفرحات ينهج بابه
..
..
إليا ذكرتك ياعزا الروح ونيت // وعزي لمن مثلي تزايد عذابه
أقسمت لك باللي فرض حجة البيت // منساك لو القبر شيّدترابه
..
..
أنت الذي يانور عيني تجنيت //ونهبت قلبي من كنينه نهابه
وأنا الذي بسواق حبك تماديت // وقلبي دخل وادي هواك وعذابه
..
..
أبيه يسمع عبرتي والتناهيت // والحب في قلبي غطس كل نابه
على الذي بآيات حبه تسليت // طفلٍ سلب مكنون عقلي وذابه
.
.
وجدي على لاماه ياليت ياليت // أبيح زبن ان كان قام وسعى به
اما فزع لي وانتخى شايع الصيت // والا ترك غاليه ينزف صوابه
.
.
من ضيقةٍ بالصدر ياعمير ناديت// زبن المسمى وين حيٍ نحابه



.................... .................... .......... ..................




دوك قلبي



انبيك يامن هو عن الحال نشاد
شف دوك قلبي من محانيه مفقود

مشيت بدروبٍ عتيقات وجداد
ولقيت بيبان الموده بهن كود

دخلتهن عقب العناء هو والاجهاد
وقبلي دخلهن ناظم الدرع داؤود

مابين حام وسام جور الهوى ساد
في كل قلبٍ شاغل الحب ماجود

كلٍ على ماراد صادر ووراد
عدٍ لكل الخلق بيّن ومارود

الود قد هدّا صليبين الأولاد
البيض تشهد به وتشهد به السود

لي فيه قرّر صافي الخد ميعاد
ودخلت ماميزت للنقص والزود

صادفت ملهوف الحشا ظبي الأجراد
طفلٍ عليه من البها ستر وعقود

طفلٍ نفل بالزين غضات الأنهاد
به سحر هاروتٍ وماروت منضود

له قلت راع لحالتي يابن الأجواد
ارفق على قلبٍ من الحب مضهود

لجلج بسودٍ طرفهن للحشا جاد
وادي فؤادي عقبهن تقل مجرود

وخلاني اجرع بالهوى كل ماكاد
كني بوسط الموج تلعب بي النود

ونيت من كود العنا عقب ماكاد
ونة خالوجيٍ على جلد مفرود

ماينفع العشاق ترديد الأوجاد
ان شاف من غاليه ميلات وصدود

من عقب فقده حاربت عيني الزاد
وعيني لها عن لذة النوم راصود

بغيت اجيب اسمه على روس الأشهاد
لولاه يلحقني من الناس منقود

انا ونفسي عقب فرقاه بجهاد
واغضي وكن بناضري يرتكز عود

صبرت واثر الصبر يرّث بالاكباد
وخلا فؤادي خافق القلب ملهود

فرقا لطيف الروح لاعاد لاعاد
القلب من فرقاه يرعى به الدود

يازبن قلبي فيه جور الهوى زاد
كنه بما جاء قيس يازبن موعود

من غاب عني ماتهنيت برقاد
قلبي لقلب مغيزل العين مشدود

يمشي معه يازبن في كل ماراد
ماله عن الغالي محاريف وصدود

لو ان قلبي من صليب الصخر باد
ومن المحبه صار به كسر ولهود

يازبن شفت الكود من جور الأنكاد
وحبٍ دخلت احماه حبٍ بلا حدود

الله يذكر من فقدناه بجماد
وانك تلم الشمل ياخير معبود



.................... .................... .......... ................




الصدر ضاق



الصدر ضاق وحاير الدمع دفاق
من ناظر(ن) من حاير الدمع مرهوق

دمع تكبه عين عاشق ومشتاق
ارعد سماها بالغضب ومطر الموق

الا سفح من فوق الاوجان وانساق
يسيل منه معيلت مرتع النوق

محدن رحمني يوم الاقدار غراق
منجور دمعاتٍ تكسر بصندوق

صدر من الفرقاء رمع فيه دقاق
ووجس معاليق الحشا يشعلن فوق

فاذا بغيت ادله تذكرت الافراق
طفلا على شل المعاليق مطفوق

طفلا نقل بالزين غضات الاعناق
عزالله انه طالني منه ملحوق

في مامضا دنياي جتلي بالاوفاق
وردت عددهن قبل ماهوب مطروق

جيت الحبيب داله بالكرى راق
ومجوهرات امبيسمه ذقتهن ذوق

يوم انتبه لي صاحبي بعد مافاق
اصبح يعاتبني على الغدر والبوق

يقول مامثلك للجواد سراق
ولاانت على هذا من الناس مسبوق

قلت ارحمو من زاركم ماله ارفاق
ورووس الافاعي بالقدم حطهن سوق

ماله رفيق وبه يضيقن الافاق
واذا جفيتو مايبي كل مخلوق

فطلق حجاجه وبدل الوجه بشراق
وافتر عن بيضاء تكاشف بها اوراق

فنهن سقاني كاس خمرا بترياق
زود على ماصار بالغدر مسروق

احباب لحباب تعاطف بالارياق
وارواح تحيا بين عاشق ومعشوق

هو حط ذرعانه لي افراش وارواق
وانا لويت العضد لمعنقه طوق

ثوبه نظيف ولاوطى فيه عشاق
وثوب الخنا يجوز به كل منطوق


.................... .................... .......... ..................




بالدمع عيني خيّلت وامطرت له



اللي هتف باسماه قلبي وناداه
حتى الضلوع بوجدها صفقت له

اللي غرامه تل قلبي من أقصاه
وبالدمع عيني خيّلت وامطرت له

اللي عسفت النفس لاجله ولرضاه
والرجل في سمر الغداري عنت له

بيا سبب عهد الهوا ليه ينساه
وينسى تخطي رجلي اللي خطت له

الرجل لو هو نازح الدار تنصاه
على حثاث القاع يا ما مشت له

أموت من فرقاه واحيا بذكراه
والروح خلت جسمه وانتحت له

قولو له أنه عذب القلب وأدماه
وحي يود لقاه ماله بقتله

ياكود والله غيبة عقب لاماه
وعيني بكت فرقاه ثم اخجلت له

ماصاب قيس بحب ليلى توطاه
ولوعات قيس وماجرى له جرت له

مالاق له غيره من الناس مشهاه
ويعاف كل الخود لو عرضت له

ان شاف زوله مغرم القلب يبراه
وان غير صد مايلتفت له

أغليه لامانساه واذكر سجاياه
لوهو بعيد الدار نفسي هفت له

معذبي بالحب وان حل طرياه
اسرار ودي بالضمير اهتفت له

لو هو ظهر للناس وابدى محياه
كل الخلايق بالجمال اشهدت له

عزاه ياقلب على الصبر ماقواه
لو مابغى الفرقا عصت واخطمت له

عزي لمن دمعه على الخد مجراه
ودنياه غيب نورها مااسفرت له

قولو لبن سلوم ابو زيد ينخاه
يوم ان غارات الهوا صادفت له

يتابع الونات من كود ماجاه
لوكثر الونات مافرجت له

يهيم مثل موده وسط مضماه
يذكر سنين بالوداد ضحكت له

ماجت له الدنيا على ماتمناه
وذياب ياسه من حبيبه عودت له

يكفيه من جور الهوا ربع ماجاه
وتغيرت دنياه يوم اوجهت له

قلبه من الحرمان فاخت حناياه
من يوم باقي ايامها ماصفت له

هنيت من حصل مرامه بدنياه
والورق بلحون السعد غردت له

هنيت من حصل مرامه بدنياه
والورق بلحون السعد غردت له

المولع الي في طريق الهوا تاه
لومابغاه اشراك دربه سعت له



.................... .................... .......... ...............




يازين



يازين قلبي راح مني يباريك
واصبح مقره بين الاضلاع خالي

بالحلم ياسيد العذارى يناجيك
وبالعلم له وسط الضمير اجتوالي

طابت لي اذكارك وطابت مواريك
وطابت عمامك يوم طاب الخوالي

ارضيتني وبعالم الحب ابرضيك
انت الحبيب اللي بديت وبدالي

لعل رب صورك لي يخليك
تشفي فوادي مابقن الليالي

انا على خافي ضميرك موليك
في منزل مايسكنه كود غالي

عينك تراعيني وعيني تراعيك
اشفق من الصايم لشوف الهلالي

نصبح مصابيحك ونمسي مماسيك
وانا ورا ضنك بعيد المدالي

انا لي ضاعت جهود الشبابيك
ارسي على صيد الوحش باحتيالي

ياشبة وضحه زينوا فوقها ديك
تموج للطياح روس المقالي



.................... .................... .......... .................... .




يكفيني هواها



أنا من نجد يكفيني هواها
ويبري لوعتي شربي لماها

وشوفي من نبيه من نوده
غزال تابع قلبي هواها

غزال ضيعت عقلي وروحي
رمت قلبي وقلبي ما رماها

لها بالروح وفوادي موده
ولا شي من احوالي خفاها

تعرف اني لها مملوك طايع
ابيع الروح في دورة رضاها

اهيم بحبها واخفي جروحي
وقلبي ما عشق زول سواها

توقد حبها باقصى فوادي
ونار الحب يحرقني لظاها

ملكني بالهوى عذب السجايا
ولا اذكر ساعة قلبي نساها

نحيل الخصر وضاح الثنايا
نظيم الدر منظوم بفاها

فجعني بالهوى ورقا حمامه
الى غنت يذكرني غناها

يذكرني وليف غاب عني
وعيني منه جاها ما كفاها



.................... .................... .......... ....................




يقول من عدى



يقول من عدى على راس عالي
رجم طويل يدهله كل قرناس

في راس مرجوم عسير المنالى
يشتاق له مندك بالقلب هوجاس

قعدت في راسه وحيد لحالى
والقلب في لجات الافكار غطاس

وقعدت اعد ابامها والليالى
دنيا تقلب ما عرفنا لها قياس

دنيا تفرق بين غالى وغالى
لو شفت منها ربح يرجع للافلاس

يا ما هفا به من رجال مدالى
ما كنهم ركبوا على قب الافراس

ولا رددوا صم الرمك للتوالى
ولا ثار عج الخيل في كل مرواس

ولا قلطوهن للكمين الموالى
ولا صار فوق ظهورهن شلع الانفاس

في حومة الهيجا لهن اجتوالى
كل يبى من زاية الفعل نوماس

من بينهم عود الجنا والسلالى
مثل البروق الليل الادماس

يقطعك دنيا ما لها أول وتالى
لو اضحكت تبكى وتوريك الاتعاس

يا ابجاد شب النار وادنى الدلالى
واكسر لنا يا ابجاد ما يقعد الراس

فنجال يغدي ما تصور ببالى
وروابع تضرب بها اخماس وأسداس

لعل قصر ما يجيبه اظلالى
ينهد من عالى مبانيه للساس

لى صار ما هو مدهل للرجالى
وملجأ لمن هو يشكى الظيم والباس

بحسناك ما منشى حقوق الخيالى
يا خالق اجناس ومفنى اجناس

تجعل مقره دارس العهد بالى
صحصاح دو خالى ما به أو ناس

لا خاب ظنك بالرفيق الموالى
مالك مشاريه على باقي الناس

وإن ناشنى من بعض الادنين صالى
مانى عن الزلات مخبر وبلاس

كالعنبر الغالى بالأسواق غالى
ولا درهم الفضية على صفر ونحاس

اجزية بالصده جنوب وشمالى
واتلى هوى قلبى اليا هب نسناس

المستريح اللى من العقل خالى
ما هو ولجات الهواجيس غطاس

ما هو بمثلى مشكلاته اجلالى
عجزت اسجلهن بحبر وقرطاس

حملى ثقيل وشلت حملى لحالى
ونصبر على ضيم الليالى والاتعاس

برسي كما ترسي عوالى الجبالى
ما ينهزع حيد عليه القدم داس

متى تربع دارنا والمفالى
تخضر افياضه عقب ما هي بيباس

ونشوف فيه الديدحان متوالى
مثل الرعاف بخصر مدقوق الالعاس

ينثر على البيداء سواة الزوالي
يشرق حماره شرقة الصبغ بالكاس



.................... .................... .......... .............




لولا الهرم والفقر



لولا الهرم والفقر والثالث الموت

يالادمي بلكون ياعضم شانك

سخّرت ذرات الهوا تفهم الصوت

وخليتها اطوع من تحرك بنانك
جماد تكلمها وهي وسط تابوت

تاخذ وتعطي ما صدر من بيانك

وعزمت من فوق القمر تبني بيوت

من يقهرك لوهو طويل زمانك

لولا الثلاث وشان من قّر الفوت

نفّذت كل اللي يقوله لسانك





,,,,,,,,,,,,,,, ,,,,,,,,,,,,,,, ,,,,,,,,,,,,,,,

[توتى العمدة]

عاشت الايادي للموضوع
طرح جميل ومميز
دوم الابداع
تحيتي

[طارق سرور]

طرح رائع وكلمات مؤثرة جداااااا

شكرى وتقديرى اختى نووووور