دليل حواء للأناقه والشياكه فى شتاء 2009

أحمد اسماعيل · 12-09-2008, 09:05 PM

أولا : بلاش تجري ورا الموضة :-

دي نقطة دايما بنأكد عليها في كلامنا وهي إنك المفروض ما تجريش وراء الموضة
مهما كانت الموضة دي عاجباكي؛ لأن الموضة دي ممكن تكون مش مناسبة ليكي...

كمان مش لازم الموضة اللي نازلة تكون كلها حاجات حلوة لأن ممكن تظهر حاجات
تكون موضة بس شكلها مش حلو وفي الوقت ده لازم تاخدي بالك كويس وتختاري
الأشكال الحلوة وتبعدي عن الحاجات اللي مش حلوة...

ثانيا : مش لازم ماركات غالية :-

مش شرط أبدا علشان تكوني شيك إن لبسك يكون ماركات عالمية وغالية بالعكس
إنت ممكن تجيبي حاجات بأسعار عادية جدا وتوفّقيها مع نفسك وفي نفس الوقت
تبان الحاجات دي في منتهى الشياكة من غير ما تدفعي فلوس كتير.

ثالثا : لكل جسم عيوبه :-

لازم تكوني عارفة إن كل جسم فيه عيوب وإن مفيش حد قوامه مثالي وإن كل
الحكاية إن فيه ناس بتقدر إنها تشوف العيوب بتاعة جسمها وتشوف إزاي إنها تداريها؟!

علشان كده مش عايزاكي تتكسفي من جسمك وتاخدي بالك إنك تختاري اللبس اللي
يداري عيوب جسمك وده هتعرفيه وإنت في المحل أثناء ما بتقيسي لبسك تبصي في
المراية وتشوفي إذا كان اللبس ده مناسب ليكي ومداري فعلا عيوب جسمك ولا لأ؟!

يعني من الآخر.. لو لقيتي موديل مداري عيوب جسمك وشيك عليكي يبقى اشتريه
لكن لو كان مش مداري عيوب جسمك يبقى شوفي موديل تاني يكون مناسب ليكي..

رابعا : خليكي موضوعية مع نفسِك :-

فيه غلطة بتقع فيها بنات كتير وهي إنهم يقولوا إن لون بشرتهم غامقة يبقى يلبسوا
الألوان الفاتحة ويبعدوا عن الألوان الغامقة ودي حاجة مش صح بالمرة وده لأن
كل بشرة لها درجة معينة وبالتالي بنلاقي إن البنت اللي بشرتها قمحية بدرجة
معينة ممكن يليق عليها اللون الأحمر الداكن ويفتح لون وشها كمان..

علشان كده عايزاكي تبقي موضوعية مع نفسك وإنت بتقيسي هدومك
وتقفي قدام المراية وتشوفي إذا كان اللون ده مناسب فعلا ليكي ولا لأ؟

أعتقد إنك لو مشيتي على الكلام ده هتقدري فعلا إنك تكوني بنت متميزة في شتاء 2009

ودلوقتي حالا هنعرف الموضة

بالنسبة للبلوفرات :-

طبعا البلوفر من القطع الأساسية والتقليدية في فصل الشتاء بس السنة
دي حصل نقلة كبيرة في شكل البلوفر فهنلاقي بلوفرات بأشكال وخامات
وألوان متعددة فهنلاقي خامات زي "الصوف" و"الموهير" و"الصوف
على قطن" و"الكشمير".....

ودي تشكيلة متنوعة من البلوفرات هتساعدك على الاختيار .

بلوفر طويل على شكل تونيك لونه رمادي غامق ممكن إنك تلبسي عليه "بنطلون أسود"
أو "رمادي" وتحت البلوفر تلبسي "بادي أبيض" أو "أحمر"...
ولو كنت محجبة يبقى تلبسي طرحة "حمراء" أو "رمادي"...

بلوفر أزرق قصير نازل بقصّات من تحت الصدر.. ممكن إنك تلبسي معاه
"بنطلون أسود" أو "أزرق غامق".. وعلى فكرة اللون الأزرق
بدرجاته المختلفة هو موضة شتاء 2009.

ده شكل تاني من أشكال البلوفر التريكو نازل وعلى فكرة الشكل ده كان موجود
زمان في السبعينات ورجع تاني موضة وبيتميز بالغرزة العريضة وبالتالي
هتلاقي نفسك محتاجة إنك تلبسي بادي من تحته.. وعلى فكرة اللون
الأخضر بدرجاته المختلفة هو موضة شتاء 2009.

ظهر في شتاء 2009 موضة جديدة وهي البلوفر 3/4 كم وده هيحتاج
إنك تلبسي تحته بادي يكون لونه زي لون البنطلون..

اللون الموف كان موجود معانا في شتاء 2008 وبنلاقيه معانا وبقوة في شتاء 2009.

وطبعا اللون النبيتي والأحمر بدرجاتهم المختلفة هما ملوك الموضة في كل شتاء.

ودى مجموعة بلوفرات بأشكال وألوان مختلفه ممكن تبصى عليها ...

الفستان الصوف الطويل :-

تعود في شتاء 2009 موضة الفساتين الصوف اللي بتصل إلى فوق الركبة..
وطبعا في الحالة دي هتحتاجي إنك تلبسي بنطلون تحت الفستان ده..

ودى شوية تصميمات ممكن تتفرجو عليهااا .

أحمد اسماعيل · 12-09-2008, 09:06 PM

الجاكيت :-

يعتبر الجاكيت من القطع الشتوية اللي محدش يقدر يستغني عنها خصوصا في أيام الشتاء الباردة...
والجواكت ليها تصميمات متعددة منها الطويل ومنها القصير وفيه منها المصنوع من الجلد
أو الصوف أو الوتربروف أو الجينز..

والجاكيت بيتميز بإنه ممكن تلبسيه لوحده بس تلبسي من تحته بادي يكون لونه مناسب للون الجاكيت.

ودى شوية تصميمات ممكن تتفرجو عليها .