|
هـى حقيقي بقت تكرهنا .. تجربة أولى
السلام عليكم إخوانى وأخواتى الاعزاء تحية مبللة بأريج الورود ، فقط لتليق بالرائعون هنا فى صدفة محاولة أولى لسطر شئ بسيط باللهجة العامية ، وما تمتاز به من سهولة فى الالقاء وبساطة المعني ، لبعدها عن التحويرات والالفاظ المقعرة ، مع ضمان إيصال المعنى للمتلقي أتمنى أن تنال قليلاً من إستحسانكم ، وإن لم يكن فعذري إخوانى أنها محاولتى الأولى فلتتقبلوا منى كل الود والاحترام دمتم إخوانى رائعون كأنتم ***** حسبنا الله البلد بلدهم ، وإحنا عبيدهم يبيعوها يأجروها يشحّتوها فى مناقصة موش مزايدة يسربوها أو حتي ببلاش يسيبوها للى عايزين يغتصبوها بتراب الفلوس يرموها وولاد الارض الطيبة موش لاقيين لقمة ياكلوها وولاد الـــ ....... (ولا بلاش) جاتهم تُخمة من كتر الخير ضربوا لخمة ضوافرهم وشرورهم كبرت .. وعيونهم فارغة .. وكروشهم سِمنت وبعد ما كبروا وتخنوا وسِمنوا .. برضو باعوها ولاد الإيييه !! توشكي الوهم ... كانت أمل .. كانت حلم .. أننا نبقي .. ونشوف روحنا بنخبز عيشنا بمية نيلنا وبعرقنا ومن تراب أرضنا موش نشحت شوية قمح من أمريكا وتذلنا وتملّى أوامرها علينا .. أقفل معبر ... إفتح سجنكـ إحبس أهلكـ إلعن نفسكـ إقلع .. إلبس إركع .. إخرس كبل حريات أولادكـ قلت انا أشجب .. أنا أستنكر أرفض إنى أركع لك واسجد جوز امنا قال لى : يا ابني اتنيل بختكـ مايل .. حلمكـ هايف بس يا عيّل .. أُسكت أحسن أجيبلكـ (بُعبُع) عارف البُعبُع ؟ ده ورى الشمس تلاقي مكانه مستنيك كده جوه السجن فى زنزانة سودا مصبوغ بابها بلون الدم دمى ودمك ودم أبونا كل الناس الى انت شايفهم واللى سامعهم ومسكتهم ومجننهم ومجوعهم كل اللى انتى معري جثثهم أموات كانوا أو أحياء كله فِداكـ بيع شركاتكـ .. بيع عمالك بيع علمائكـ .. بيع افذاذكـ أوأجدادكـ أو بيع حتى تراب القبر بيع الارض وبيع الغاز بيع العرض وبيع الناس بيع البحر وبيع النيل بيع يا عواد ... بيع يا أصيل بيع وابقي اشتري باللي تبيعه أرض وناس موش هاتلاقي ناس للبيع عارف ليه ؟؟ أصلنا كنا آخر ناس ممكن تتباع أصلنا كنا آخر حد رخيص موجود ولا هاتلاقي وطن للبيع .. اصل مافيش أوطان تنداس الاوطان تتشال فى القلب .. تتحمي بالدم تاج يتشال كده فوق الراس واحنا وطنا طردنا ... كِرهنا إحنا وطنا اتبري منا إحنا وطنا استغني عنا إحنا وطنا حرق أوراقنا وكأننا أطفال لقطاء على باب جامع فى ملاية بيضا ملفوف متكلفت مـ البرد .. مش لاقي لقمة ولا لاقي هدمة ولا رحمة فى قلوب الخلق واستناني .. تعالى أقولكـ كلمة حق.. نفسي ما تنساش وانت بتشتري تشتري كدبة وخدعة جديدة لونها جديد قماشها جديد اصلنا بنحب التجديد بنحب الكدب المتزوق بنحب نفرفش ونروق وبنكره نحلم بالعِزة عِزة مين ؟ بس يا راجل .. سيبك واشرب علشان تنسي خليك كده على طول مسطول .. أوعى تصحصح !! دي الايام صعبة تتعاش من غير بانجو أو خُشخَاش من غير بِرشام أو أفلام من غير رقاصة تتمايل وشباب فاضي وراضي وعاطل يا سلام سلم .. ده شباب عايق لابس ومكجول وملمع ودماغه .. نضيفة .. وبتلمع واحد فيهم جاي يسألنى .. أيوة يا كابتن .. عايز حاجة؟؟ لا يا معلم سيبك منى.. أنا أصلي بخرف على نفسي أصل انا أهبل أو باستهبِل أو ماشي بدماغ مُختل كان نفسي احلم واتمني كان نفسي ألاقي أحلامي نفسي أعيد جوة فى بلدي وأصوم ستة وتلاتين يوم واسمع أمي وهي تقولي ..قوم اتسحر قوم علشان الفجر هايطلع !! بجد يا أمي ..هو حقيقي في فجر هايطلع؟؟؟ يعنى هايجي الفجر يا أمي ؟؟ قالت أمى ..طبعاً يا ابني .. مالك كده شايفاكـ مستغرب؟؟ لازم بعد الليل والضلمة هايجي الفجر لازم بعد الخوف والعتمة هايطلع صُبح لازم يا ابني بس اتفائل بس أقولكـ ..أصل ده مكتوب كده نتغرب ونسيبها ونبعد ونجرب علشان هي بقت تكرهنا تعرف .. حد حبيبي أوى قلت له (دي بتكرهنا) قالى لا .. أسكت يا أهبل .. جوز أمنا ده اللي بيكرهنا لكن أمنا غصبن عنها .. سيف متسلط على رقبتها .. سكينة تلمة ولمة وزحمة خنقة وتجار باعوا الذمة باعوا هدومها وعروا جسدها وغصبن عني انا وانت وهو نسكت ونخبي ونستسلم نهرب ونسافر .. نهجرها نستني الفرصة ونتمني أصلي باحبه .. سمعت كلامه وما صدقت انها تكرهنا وانت يا يا سيدنا قولى رأيكـ هي حقيقي بقت تكرهنا ؟؟ |
رد: هـى حقيقي بقت تكرهنا .. تجربة أولى
مشاء الله عليك درش متميز كالعادة وصاحب الابداعات المتوالية ما اروع ان تعبر عن ما يدور بالنفوس من خلال الحروف نسأل اله ان يزيل الغمة عم كل البلاد ويهدى العباد وندعوا ان يصلح لنا حال ولاة أمورنا ويجعل للافضل أيامنا لا حرمنا الله من روعة قلمك وطيب شخصيتك دعواتى لك بالصحة والعافية |
رد: هـى حقيقي بقت تكرهنا .. تجربة أولى
روووووووووووعه كلمات في صميم الواقع يعطيك العافيه اخي مصطفى على البوح المميز والرائع تقبل احترامي وتقديري |
رد: هـى حقيقي بقت تكرهنا .. تجربة أولى
عارف بتكرهنا ليه لانه هو كده الضعيف الواهن المذلول لازم يتكره
مصطفى كلاك ده بجد انا حاسه بكل ذرة فيا انا واهلى بنمر بابتلاء من الله ولله الحمد ولكن صدمة صدمة ببلدنا اى ذل واى مهانة فى البلد دى شئ بجد يخليها تكرهنا لانه للاسف احنا راضيين وساكتين او بالاحرى مخروسين سلمت يمناك اخى دوما يسعدنى قراءة مايخطه قلمك دعواتى لك بكل خير |
رد: هـى حقيقي بقت تكرهنا .. تجربة أولى
انت انت يابلادى
حكاوى وغناوى يسمعها كل غاوى ماسك الناى جالس على نيلك او فى الوداى والعيون تسمع وتلالى يغنيها الف راوى يقولك مصر دى بلادى يلقيها حكاية لها العجب !! رحلة زادك وزوادك كلمة وضحكة ذكرى وفرحة طفولة شقية انت يابلادى حكاية زمانى ايامى 00 عمرى ناسك دهب قلوبهم تداوى كل ارضك 00سماءك زرعك 00 ثمرك ازى تكرهنا وهى شجرة حب تعطى 00 وتظلل كما واحة الامان كل ماتلقى عطشان ترويه من نيلها تحضنه تخليه يبوس ترابها اصلها00 غالية وعاليه زى شجرة النخيل بعمق الارض كتيييييييييير وفى السما شامخة بعمر الاف السنين كل مايتغرب فيك وليد يرجع مشتاق كله حنين دموعه تسيل تروى ترابك يحلف بسماءك يغنى لك 00 ويحكى لك ازى الغربة وبعد الصحبة واللمة ولحظات الوحدة لكن اما ارجع ترجع البسمة والضحكة رغم مافيييييييك ومهما اتغيرت ناسك تفضلى وناسة بطيبة اصلك 00 تجد الخير يحصرك يجرى عليك يضمك اصله ابن عمك لالالالا ده قريبك شرب مياه نيلك بقى حتى منك 00 من دمك 00 من وريدك ازى تكرهنا وهى عارفة مهما كان فيها ناس تبيع الوهم ناس تنسى مصر لكن بيوم ترجع تانى تشرب من نيلها وتندم على عمايلها ليه ننسى يوم اكتوبر ونداء الله اكبر وجحافل نصر من ولادك يامصر ولمة الشعب والخير فى كل نفس ليييييييييه ننسى لما تحتاجنا نقف صف صف كله يمد الايد يساعد ولايفكر يبيع ازاى بعد ده كله نقول اصل وطنا بيكرهنا وبكره يجى العيد وتشوف الكل سعيد عيد بكره هو ضحكتنا 00 لمتنا حتى فسحتنا براءة طفولتنا -- واحلامنا مصر 00 تاج فوق راسنا حيظل فيها الخير مهما كان فيها ناس غيييييييير مصطفى عذرا لقلمى لاادرى كيف سكب حروفه حين صاحبته دموع حب مصر فهى بالدم ومع الانفاس يجرى منا الاحساس كون بخير دوما معطاءامعبرا بقوة بقلمك الزاخر ولكن تبقى مصر |
رد: هـى حقيقي بقت تكرهنا .. تجربة أولى
مع كل طلعة شمس عليها
بتنتج خير كتير من ارضيها من نيل بيجرى فى وسطيها لغاز وبترول ملى ارضيها لاثار ملىها فى كل حوريها صدقنى العيب مش فيها العيب فى الى قيمين عليها تقبل مرورى |
رد: هـى حقيقي بقت تكرهنا .. تجربة أولى
بس يا عيّل .. أُسكت أحسن أجيبلكـ (بُعبُع) عارف البُعبُع ؟ ده ورى الشمس تلاقي مكانه مستنيك كده جوه السجن فى زنزانة سودا مصبوغ بابها بلون الدم دمى ودمك ودم أبونا انا كبرت على الزنازين بصراحة العظمة كبرت هههههههههههههه ما عرفهوش يا باشا ههههههههههه كلام جميل وواقعى يا مصطفى وللاسف انة واقع البلد مش بتكرهنا ولا احنا بنكرهها بس للاسف فيها ناس عايششين ووكلنها والعة وناس مدسين ولا حتى لاقين الولعة وهى دى بلدنا تسلم يا مصطفى وما تقلقش ابقى بس سيب فلوس العيش والحلوى وتوكل على الله هههههه |
رد: هـى حقيقي بقت تكرهنا .. تجربة أولى
اقتباس:
وما أروعكـ أخى احمد كالعادة .. مرور مميز وكلمات طيبة أشكركـ أخى الحبيب على هذا المرور العبق حفظكـ الله اخى الحبيب |
رد: هـى حقيقي بقت تكرهنا .. تجربة أولى
اقتباس:
أشكركـ أختى الكريمة على هذا المرور الطيب بارككـ الله أختى تحيتي لكـ |
رد: هـى حقيقي بقت تكرهنا .. تجربة أولى
اقتباس:
أختى الفاضلة / سلسبيلا اللهم فرج كربكم أختى وكرب كل مكروب هكذا هو حالنا في بلدنا كالغرباء .. لنا الله أختى نتمنى أن يهدي الله الجميع لما فيه خير البلاد وصالح العباد أختى الفاضلة .. إصبروا واحتسبوا عسى الله أن يأتى بالفتح أو أمر من عنده وفقكـ الله أختى وأسعدكـ وباركـ لكـ جزيل شكرى وإمتنانى على هذا المرور الرائع والكلمات الطيبة شكراً أختى |
رد: هـى حقيقي بقت تكرهنا .. تجربة أولى
اقتباس:
نور أختى الفاضلة ... حيث مرور الخير الذي يهطل فكراً حين تشريفه أختى .. مررت من هنا ونثرت عطر قلمكـ فازدانت الصفحة وجبرتي ما بها من نقص بعاطر مدادكـ أشكركـ أختى على مروركـ وأولاً وعلى تلكم الإضافة الرائعة ثانيا وثالثاً وإلى المنتهي بوركت أختى شرف الله قدركـ |
رد: هـى حقيقي بقت تكرهنا .. تجربة أولى
اقتباس:
أخى أحمد صدقت اخى الحبيب ... العيب موش فيها أبداً العيب قى اللى قايمين عليها كم هي رائعة إضافتكـ ، وكم هو حكيم رأيكـ لكـ أخى الفاضل .. باقات مودتى وإحترامي أسعد الله أيامكـ ووفقكـ إبقى كريماً أخى الفاضل |
رد: هـى حقيقي بقت تكرهنا .. تجربة أولى
اقتباس:
هههههههههههههه أختى الكريمة / marmer أضحكـ الله سنكـ وأسعدكـ دوماً يا رب على فكرة ... بياخدوا اللي يعرفوا واللى ما يعرفوش .. يعنى الكل هاياكل عيش وحلاوة أشكركـ أختى الفاضلة على روعة مروركـ دمتِ بكل الخير |
رد: هـى حقيقي بقت تكرهنا .. تجربة أولى
برغم ضعف البنيه اللغويه لما كتبته لكن : إستخرج مما سبق ما يدل على أن تفكيري أنا وأهلي وأصدقائي هو تفكير إخواني إلى الأستاذه / نور صاحبة صكوك الوطنيه التي توزعها كيفما شاءت وصاحبة ختم (الإخوان) الذي تطبع به من خالفها الرأي من النص السابق والذي كتبته في العام 2009 يرجى من سيادتكم إستخراج ما يدل على فكري الإخواني كما تفضلتِ وقلت لي بأن فكري وفكر أهلي وأصدقائي كذلك |
| الساعة الآن 06:13 AM. |
Powered by vBulletin® Version 3.8.11
Copyright ©2000 - 2024, Jelsoft Enterprises Ltd.
SEO by vBSEO 3.6.0 (Unregistered) Trans by